Будынак

Паводле найбольш ранняга вядомага плана Пінска з пазначанымі асобнымі жылымі і гаспадарчымі пабудовамі, выкананага землямерам Феліксам Гумніцкім для Межавага суда ў 1839 г., забудова квартала была драўлянай. У глыбіні квартала знаходзіўся млын. На ўчастку, на якім размешчаны дом №5, знаходзіліся жылы дом, флігель і свіран.  Пасля Вялікай Айчыннай вайны выкарыстоўваўся як жылы. У 1969 г. праводзіўся капітальны рамонт. У 1973 г. будынак яшчэ значыўся як жылы, пазней быў заняты ваенным камісарыятам.

 Пад адным нумарам аб'яднаны два будынкі -- былы № 3 і № 5. Дом (былы № 3) аднапавярховы прамавугольны ў плане на высокім цокалі. Накрыты двухсхільным дахам. Фасад вырашаны сціпла, без дэкору. Члянёны прамавугольнымі аконнымі праёмамі. Асіметрычна з правага боку размешчаны дзвярны праём. Пад дахам праходзіць карніз. На тарцовым фасадзе на франтоне паабапал круглай люкарны літары F і M.Другі будынак (№5) аднапавярховы з цокальным паверхам. На галоўным і дваровым фасадах лучковыя вокны першага паверха дэкарыраваны зверху абрамленнем з замковым камнем, падаконным карнізам са ступеньчатымі сухарыкамі. Цокальны паверх мае лучковыя вокны, на галоўным фасадзе часткова прамаввугольныя без ліштваў. Завершаны фасады шырокім карнізным поясам.