Будынак

Будынак на вуглу вуліц Касцюшкі і генерала Лістоўскага пасля пажару 1921 года, які знішчыў цалкам папярэдні будынак, быў адбудаваны Маттам Ісідорам у 1925 годзе. Паўночную частку будынка і мансарду займала жыллё гаспадара, астатнюю частку абутковая майстэрня і крама. Пасля рамонту рашэннем Гарвыканкама ад 20 мая 1954 года будынак быў перададзены Гархарчгандлю і ў 1971 годзе злучаны з суседнім будынкам па вуліцы Леніна, 11. Аднапавярховы Г-падобны ў плане будынак накрыты вальмавым дахам. Крыло па вул. Леніна шчыльна прымыкае да дома № 9 і з'яўляецца яго працягам (відавочна, частка крыла першапачаткова адносілася да суседняга дома № 9). Вуглавая частка будынка зрэзана, аформлена арачным дзвярным праёмам. Фасады раскрапаваны лапаткамі. Крыло па вул. Леніна прарэзана прамавугольнымі праёмамі вітрын. Крыло будынка па вул. Камсамольскай члянёна высокімі арачнымі нішамі і прамавугольнымі аконнымі праёмамі без ліштваў. Завершаны фасады шматслойным карнізам.