зваротная сувязь
Калі вы заўважылі недакладнасць, ці маеце пытанне - лістуйце:
Будынак
Шыфр
212Е000600_11
Катэгорыя каштоўнасці
Тып каштоўнасці
Падтып каштоўнасці
Месца знаходжання
Віцебская вобласць, Полацкі раён, г. Полацк, вул. Камуністычная, 18
Датаванне
1957
Апісанне
Будынак уваходзіць у склад забудовы гістарычнага цэнтра г. Полацка. З’яўляецца прыкладам пабудоў грамадзянскай архітэктуры 1950-х гадоў, у архітэктурным рашэнні якіх прыменена ордэрная пластыка. Для будаўніцтва жылога дома № 18 для швейнай фабрыкі быў прыняты тыпавы праект вуглавога 49-кватэрнага дома з магазінам. Завершана будаўніцтва жылога дома ў 1957 г. За час эксплуатацыі будынка на першым паверсе перароблена частка аконных праёмаў у дзвярныя, замураваны вітрынны аконны праём у вуглавой частцы на фасадзе па вул. Гогаля, заменена запаўненне ў большасці аконных і дзвярных праёмаў, на фасадзе па вул. Гогаля прыбудаваны зашклёны тамбур.
Мураваны чатырохпавярховы з падвалам Г-падобны ў плане будынак. Накрыты вальмавым дахам. Фасады патынкаваныя і пафарбаваныя. Галоўныя і бакавы ўсходні фасады па гарызанталі падзелены прафіляванай цягай пад вокнамі трэцяга паверха, на вышыню ніжніх двух паверхаў апрацаваны рустам. На галоўным фасадзе па вул. Гогаля вылучана вуглавая частка багатай пластыкай і ў завяршэнні двухсхільным шчытом. Фасадная сцяна на першым і другім паверхах раскрапаваны пілястрамі з ляпнымі капітэлямі. Пілястры нясуць антаблементы. У цэнтры паміж парнымі пілястрамі размешчаны дзвярны праём, да яго прыстаўлены пазнейшы зашклёны тамбур. Над ім на другім паверсе балкон з металічнай простага рысунка агароджай. На ўзроўні трэцяга і чацвёртага паверхаў фасад аздоблены пластычнай складанай кампазіцыі ліштвай, якая абрамляе аконны праём трэцяга паверха і балкон на чацвёртым паверсе. Ліштва складаецца са спараных пілястр (з ляпнымі капітэлямі і філёнгамі) і ў завяршэнні архівольтам, узбагачаным ляпнымі элементамі. Крайнія пілястры ніжняга яруса на ўзроўні трэцяга паверха завяршаюцца пастаментамі з ляпнымі элементамі па форме блізкімі да дэкаратыўных вазаў з пінаклямі. Фасад па вул. Камуністычнай мае падобнае архітэктурнае рашэнне.
Сартаваць па