Будынак

Будынак № 25 размешчаныў гістарычным цэнтры Полацка на вул. Ніжне-Пакроўскай, якая адносіцца да адной са старэйшых вуліц на Вялікім пасадзе. Гэта мураваны аднапавярховы з цокальным паверхам прамавугольны ў плане будынак. Пад часткай дома існуе падвал. Фасадныя сцены цокальнага паверха патынкаваныя і пафарбаваныя, аддзеленыя ад першага паверха цягай. Сцены першага паверха абшыты па гарызанталі дошкамі. Вуглы будынка на першым паверсе вылучаны плоскімі драўлянымі лапаткамі. Будынак накрыты вальмавым дахам з паўцыркульнымі люкарнамі на бакавых фасадах.

У Вялікую Айчынную вайну жылы дом, відаць, захаваўся. На плане горада Полацка 1947 г. пазначаны як жылы. Упасляваенны час таксама функцыянаваў як жылы дом. У 1996 г. будынак рэканструяваны ў ранейшых габарытах і з захаваннем архітэктурнага рашэння. Новыя сцены ўзведзены з цэглы, на першым паверсе ашаляваныя дошкамі. Аконныя праёмы першага паверха аформлены драўлянымі ліштвамі, на бакавых і тыльным фасадзе з аканіцамі, што было характэрна для драўляных жылых дамоў.