Будынак

Будынак знаходзіцца ў гістарычным цэнтры г. Полацка. 

Для будаўніцтва жылога дома №11, хутчэй за ўсё, быў распрацаваны індывідуальны праект, або паўторна выкарыстаны. Гэта мураваны чатырохпавярховы з падвалам Г-падобны ў плане будынак. 

У забудове праспекта Ф.Скарыны 1950-х гг. будынак вызначаецца сваім архітэктурным рашэннем. У афармленні фасадаў выкарыстаны характэрныя для таго перыяду кампазіцыйныя прыёмы: чляненні фасадаў па гарызанталі і вертыкалі, раскрапоўка падоўжных фасадаў каб пазбегнуць манатоннасці лапаткамі і франтонамі ў завяршэнні, акцэнтаванне вуглавых частак, аб'яднанне вітрынных вокан калонамі і карнізамі ў блокі, спалучэнне балконаў з рознымі тыпамі агароджаў. На фасадах шырока выкарыстаны ляпныя элементы. Упрыгожванне лапатак ляпнымі арнаментальнымі стужкамі сустракаецца і ў іншых гарадах Беларусі, напрыклад, Мінску, Гомелі.

Завершана будаўніцтва жылога дома ў 1952 г. За час эксплуатацыі будынка значных перабудоў не адбывалася. Заменена запаўненне ў большасці аконных і дзвярных праёмаў, замураваны два дзвярныя праёмы на першым паверсе.