Селішча

Полацкае перадграддзе. Размешчана каля Полацкага гарадзішча, на правым і левым берагах р. Палата. Як і гарадзішча, найбольш старажытная частка паселішча, адкуль пачынаўся Полацк. Агульная плошча каля 6,3 га. Правабярэжная частка размешчана на мысе каля Чырвонага моста, плошча 0,25 га. Выявіў у 1962 і даследаваў 420 м кв. у 1962, 1967, 1979 і 1980 Г. В. Штыхаў. Культурны пласт 0,6-1,2 м.Знойдзены ляпны і ганчарны посуд, рэшткі металаапрацоўчай майстэрні Х ст., тыглі для плаўкі каляровых металаў, абрэзак сярэбранай арабскай манеты. Левабярэжную частку селішча (тэрыторыя сучаснага стадыёна "Спартак" і прылеглая тэрыторыя, агульная плошча 6 га) выявіў у 1986 і даследаваў 470 м кв. у 1988-90 С. В. Тарасаў. Культурны пласт 0,8-3 м. Знойдзены рэшткі наземных жылых і вытворчых пабудоў, ляпны посуд VIІІ - ІХ стст., рэшткі ювелірных майстэрняў Х ст., у тым ліку майстэрня па вырабу шкляных пацерак і апрацоўцы каляровых металаў. Выяўлена шмат ювелірных інструментаў і прылад працы: ювелірныя пінцэты, кавадлачка, набор гірак-разнавагаў, імітацыйная ліцейная форма для манетападобнай прывескі ў форме арабскага дырхема і інш.