Будынак

Будынак па вул. Замкавай № 16 — палац К. Храптовіча, камяніца Ф. Мучынскага, палац I. Ляхніцкага, магчыма, будынак Тульскага банка, музей атэізму і рэлігіі. Пабудаваны ў 1742-1752 гг. Тым не менш ў канцы 1980-х гг. пад час абследавання падвалаў палацу выяўлены буйнапамерная цэгла, якая характэрна для дамоў, што будваліся ў XVI - XVII ст.ст. Будынак быў пабудаваны, як рэзідэнцыя магната Храптовіча ў стылю барока (арх. Мёзар?). Моцна пашкоджаны пад час пажару 1753 г. У 1780 г. на плане характарызуецца як «пустыя муры Тызенгаўза». Перабудаваны ў 1790 г. 

Магчымы аўтар перабудовы - архітэктар М. Кнакфус (рэканструяваны будынак нагадвае дамы Лапацінскага, Бжастоўскага ў Вільні, аўтарства якіх належыць Кнакфусу, ён таксама быў капітанам літоўскай артылерыі, чым можа тлумачыцца яго цікавасць да «мілітарнай» ляпніны на фасадах будынку). В 90-я гг. ХУIII ст. будынак быў перабудаваны для новага ўладальніка шляхціча I.Мучынскага. 

Каля 1800 г. будынак купляюць магнаты Ляхніцкія. Яны ўзвялі ў сярэдзіне XIX ст. дваровыя пабудовы гаспадарчага прызначэння. Гэтыя пабудовы хутчэй за ўсё былі накрытыя гонтам. 

У 2-й палове XIX ст. будынак перайшоў да Егеля Гешаля і належыў сямьі да 1939 года. Балконы прарублены цягам XIX ст. Унутраная планіроўка зменена ў 1970-я гады. Большая частка дома, утвараючы парадны ўнутраны двор, ідзе ў глыб квартала. На вуліцу выступае толькі невялікі корпус, прарэзаны уязной аркай з чатырма пілястрамі дарычнага ордэра. У архітэктуры будынка заўважны ўплывы рускага класіцызму канца XVIII — пачатку XIX ст., аднак маюцца і ўласныя своеасаблівыя рысы — раслінныя ляпныя гірлянды над праездам у двор; форма ліштваў вокан і інш. 

 Двухпавярховы асiметрычны ў плане (трапецападобны), замкнёны па перыметры, развiты ў глыбiню двара будынак. Ва ўнутраны двор вядзе праезная арка, над цэнтральнай часткай якой ляпная гірлянда са стужкамі, у абрамленні якой медальён з гербам Гродна.