Будынак

Будынак № 27 адносіўся да аднаго домаўладання з домам № 25. У другой палове 19 ст. участак з забудовай належаў Ёселю Моўшаву Файну, з 1908 г. Ошэру Бен'ямінаву Каральчуку. Як сведчаць архіўныя дакументы, дом № 27 мае складаную гісторыю будаўніцтва. У 1883 г. на участку Файна названы толькі адзін мураваны дом (сучасны № 25), астатнія будынкі былі драўляныя. У 1895 г. па хадайніцтву домаўладальніка гарадская ўправа зацвердзіла праект на будаўніцтва мураванага флігеля разам з гаспадарчым будынкам (у адным корпусе). Флігель з гаспадарчым будынкам быў запраектаваны ў паўночна-ўсходняй вуглавой частцы пляца. Пры гэтым планавалася знесці драўляны гаспадарчы будынак, размешчаны на гэтым месцы. Па месцаразмяшчэнні флігель з гаспадарчым будынкам адпавядае паўночна-ўсходняму двароваму крылу дома № 27 (цяпер у ім кафэ)У 1899 г. Ё Файн прадставіў у гарадскую ўправу чарговы праект на прыбудову да існаваўшага мураванага гаспадарчага будынка з флігелем новага двухпавярховага флігеля. Невялікі двухпавярховы флігель (галоўны арыентаваны ў двор фасад на шырыню трох аконных праёмаў) планавалася прыбудаваць да паўднёвага тарцовага фасада Г-падобнага гаспадарча-жылога аднапавярховага будынка, ўзведзенага па праекце 1895 г.