Будынак

Будынак належыць да ліку найбольш старых жылых дамоў, што захаваліся ў гістарычным цэнтры г. Мінска. Пляц, на якім узведзены будынак, у розныя часы належаў І. Ліашону, Карказевічу, Ленскім. Апошнімі ўладальнікамі былі Сабіна Міхайлаўна Ленская і яе спадкаемцы Зянон, Міхаіл, Канстанцін Аляксандравічы Ленскія і Лізавета Васілеўская. Вядома, што ім належаў маёнтак Татаршчызна ў Койданаўскай воласці Мінскага павета. Паводле гістарычных звестак будынак складаецца з двух розначасовых аб'ёмаў. Так у ацэначнай ведамасці 1910 г. запісана, што Г-падобная частка дома, якая фасадам выходзіць на вуліцу, існуе ўжо 100 год. Такім чынам, даследчыкі адносяць будаўніцтва дома да канца 18 - пачатку 19 ст. Меншая па габарытах таксама Г-падобная ў плане частка, якая прымыкае да дваровага крыла асноўнага аб'ёму, была ўзведзена 80 гадоў таму, г.з. каля 1830 г. На плане Мінска 1833 г. дом № 31, які выходзіў фасадам на вул. Валоскую (сучасная вул. Інтэрнацыянальная), паказаны Г-падобны ў плане мураваны (пазначаны чырвоным колерам). У двары да яго прымыкала Г-падобная драўляная пабудова (на плане зафарбавана жоўтым колерам). Разам яны ўтваралі П-падобнае ў плане збудаванне.