Будынак

Будынак размешчаны ў квартале, які ўваходзіць у склад комплекснай гісторыка-культурнай каштоўнасці - гістарычнага цэнтра г. Мінска. Вул. Рэвалюцыйная адносіцца да асноўных планіровачных элементаў Верхняга горада. Першапачаткова называлася вул. Койданаўскай, у 1922 г. перайменавана ў вул. Рэвалюцыйную. Яе трасіроўка і забудова пачалі фарміравацца ў 16 ст. Вуліца звязвала новаствораны адміністрацыйна-гандлёвы цэнтр "Верхні горад" з Койданаўскім трактам. Забудова вуліцы спачатку была драўлянай. На планах пачатку - першай паловы 19 ст. (1809, 1817, 1833, 1834 гг.) па лініі вул. Койданаўскай ужо паказаны некалькі мураваных будынкаў. Адзін з будынкаў на плане 1817 г. можна суаднесці з домам пад № 6. Забудовы ўнутры ўчастка пры доме яшчэ не было.