Будынак

Пяціпавярховы з падвалам прамавугольны ў плане будынак. Накрыты пакатым вальмавым дахам. Цокаль патынкаваны і аддзелены карнізным поясам. Фасады абліцаваны керамічнымі пліткамі. Пластыка стрыманая. Галоўны фасад сіметрычнай кампазіцыі. Першы паверх члянёны высокімі арачнымі аконнымі праёмамі ў прафіляваных абрамленнях, фланкіраваны дзвярнымі праёмамі, аформленымі парталамі і супрапортамі з ляпным дэкорам. Фасадныя сцены верхніх жылых паверхаў рытмічна члянёны прамавугольнымі аконнымі праёмамі без дэкору і сіметрычна размешчанымі балконамі. Паміж 3-м і 4-м паверхамі праходзіць паясок цягі.З боку тарцовага фасада, арыентаванага на вул. Інтэрнацыянальную, у сувязі з паніжэннем рэльефу існуе цокальны паверх. Фасад падзелены цягай на адным узроўні з галоўным. Прарэзаны прамавугольнымі аконнымі праёмамі без дэкору. У цокальным паверсе ў цэнтры зроблены два дзвярныя праёмы. На 3-5-м паверхах сіметрычна размешчаны балконы. Завершаны фасады фрызавым поясам і карнізам. Дваровы фасад вырашаны спрошчана, цокальны паверх патынкаваны, верхнія абліцаваныя пліткай. Прарэзаны прамавугольнымі аконнымі праёмамі без дэкору, маюцца балконы. Да фасада прыбудаваны зашклёныя ліфтавыя шахты. Завершаны фасад арнаментаваным фрызам і карнізам.