Будынак

Двух-, чатырохпавярховы складанай аб'ёмна-прасторавай кампазіцыі будынак. Уключае асноўны вытворчы корпус і клуб. Фасады патынкаваныя. Галоўны фасад, арыентаваны на перакрыжаванне вул. Ракаўскай і Віцебскай, фланкіраваны парнымі пілястрамі, завершанымі мураванымі слупкамі, паміж якімі металічная рашотка парапета. Цэнтральная частка фасада завершана двухсхільным невысокім шчытом. Фасадная плоскасць падзелена міжпаверхавай цягай, прарэзана на першым паверсе прамавугольнымі, на другім лучковымі аконнымі праёмамі, падкрэсленымі карнізнымі паяскамі. Фасад па вул. Ракаўскай мае падобнае архітэктурнае рашэнне.