Будынак

Будынак размешчаны ў гістарычным цэнтры г. Брэста, у складзе забудовы вул. Савецкай. Вуліца Савецкая першапачаткова на адрэзку ад вул. Гогаля да вул. Піваварнай (сучасная вул. Інтэрнацыянальная) называлася Паліцэйскай, а з 1921 па 1939 годы -- вул. Е. Дамброўскага. Мураваная забудова вул. Савецкай была сфарміравана ў канцы 19 ст., галоўным чынам, пасля вялікага пажару, які адбыўся 4 мая 1895 г. Паводле тэхпашпарта будынак № 72 пабудаваны ў 1920 г. Гэтаму перыяду (1920-м гг.) адпавядаюць па стылістыцы захаваўшыяся металічныя рашоткі балконаў і лесвіцы, печы ў памяшканнях, скабяныя вырабы. Дом быў жылы, на першым паверсе памяшканні выкарыстоўваліся пад гандлёвыя ўстановы. Да нашага часу будынак захаваўся з пэўнымі стратамі першапачатковага аблічча. У пасляваенны час, відавочна, быў зменены першы паверх з боку галоўнага фасада: замуравана арка праезда, перароблены дзвярныя і аконныя праёмы. Пластыка фасадаў стрыманая, дэкор адсутнічае, з архітэктурных элементаў у чляненні галоўнага фасада выкарыстаны плоскія лапаткі, карніз. Будынак уяўляе сабой прыклад гарадской шэраговай забудовы пачатку 20 ст. Захаваліся балконныя рашоткі і часткова аконныя рамы з разьбой.