Будынак

Будынак размешчаны ў гістарычным цэнтры г. Брэста, у складзе забудовы вул. Савецкай. Вуліца Савецкая першапачаткова на адрэзку ад вул. Гогаля да вул. Піваварнай (сучасная вул. Інтэрнацыянальная) называлася Паліцэйскай, а з 1921 па 1939 годы -- вул. Дамброўскага. Мураваная забудова вул. Савецкай была сфарміравана ў канцы 19 ст., галоўным чынам, пасля вялікага пажару, які адбыўся 4 мая 1895 г. Дакладная дата будаўніцтва дома пад сучасным № 89 нам не вядома. Па тэхпашпарце ён датуецца 1917 г. Па звестках даследчыкаў гістарычнай забудовы Брэста, двухпавярховы будынак быў пабудаваны да Першай сусветнай вайны, а ў 1928 г. жылы дом быў рэканструяваны. На першым паверсе памяшканні выкарыстоўваліся пад гандлёвыя ўстановы. Да нашага часу будынак захаваўся з пэўнымі стратамі першапачатковага аблічча. У пасляваенны час, відавочна, быў зменены першы паверх з боку галоўнага фасада. У выніку пазнейшых рамонтаў страчаны балконныя рашоткі, аконная і дзвярная сталярка, за выключэннем двух аконных праёмаў і праёмаў на балкон на галоўным фасадзе і часткова на дваровым фасадзе. Двухпавярховы будынак у плане мае форму паралелаграма. Накрыты двухсхільным дахам. Асіметрычнасць галоўнаму фасаду надае размешчаны з правага боку праезд у двор. Галоўны фасад патынкаваны, вырашаны спрошчана. Па гарызанталі падзелены цягамі, завершаны карнізам. Цэнтральная частка фасада вылучана несапраўдным рызалітам. Прамавугольныя аконныя праёмы не маюць ліштваў. На другім паверсе на флангах размешчаны балконы.