Будынак

Будынак № 97 размешчаны ў гістарычным цэнтры г. Брэста, на перакрыжаванні вул. Савецкай і вул. Дзяржынскага. Вуліца Савецкая першапачаткова на адрэзку ад вул. Гогаля да вул. Піваварнай (сучасная вул. Інтэрнацыянальная) называлася Паліцэйскай, а з 1921 па 1939 годы -- вул. Дамброўскага. Вул. Дзяржынскага да сярэдзіны 1930-х гг. называлася Крывой, затым - вул. Пірацкага. Мураваная забудова квартала, у якім знаходзіцца будынак, была сфарміравана ў канцы 19 ст., галоўным чынам, пасля вялікага пажару, які адбыўся 4 мая 1895 г. Дакладная дата будаўніцтва дома пад сучасным № 97 нам не вядома. Па тэхпашпарце ён датуецца 1928 г. Аднак, як сведчаць архіўныя матэрыялы, будынак узведзены раней, мажліва, на мяжы 19 - 20 ст., а ў 1928 г. жылы дом быў рэканструяваны. Трэба адзначыць, што цяпер пад адным нумарам аб'яднаны два раней самастойныя будынкі. Вядома, што ў 1920-я гг. участак з вуглавым домам належаў Беніяміну Галубовічу. Мажліва, ён з'яўляўся ўласнікам і ў канцы 19 - пачатку 20 ст. Як сведчыць сітуацыйны план участка 1928 г., будынак быў двухпавярховы. Асноўны трапецападобны яго аб'ём арыентаваўся фасадамі на вул. Дамброўскага (вул. Савецкую) і вул. Крывую (вул. Дзяржынскага). Да нашага часу будынкі, аб'яднаныя пад № 97, захаваліся ў перабудаваным выглядзе. Трэба адзначыць, што на генеральным плане г. Брэста 1953 г. жылыя дамы пазначаны як двухпавярховыя і па канфігурацыі вельмі блізкія да паказаных на вышэйзгаданым плане 1928 г. З боку вул. Дзяржынскага яшчэ існаваў праезд, а з боку вул. Савецкай - скразны пад'езд. Пазней над дамамі надбудуюць трэці паверх, будзе знішчаны дэкор на фасадах, страчаны балкон у вуглавой частцы, закрыты праезд з вул. Дзяржынскага. У 2009 г. праведзены капітальны рамонт жылога дома з частковай рэстаўрацыяй фасадаў. Будынак уяўляе сабой прыклад гарадской шэраговай забудовы пачатку 20 ст.