Будынак

Гасцініца “Буг” уяўляе сабою Г-падобны ў плане чатырохпавярховы мураваны будынак з трохпавярховымі крыламі. Скругленаю вуглавою часткаю выходзіць на плошчу транспартную развязку пры ўездзе на Граеўскі пуцеправод. Першы паверх аддзелены шырокім складаным прафіляваным міжпаверхавым пасам з дэнтыкуламі. Асноўная паверхня сцяны першага паверху падзелена рустамі на класіцыстычныя квадры.

Замковыя камяні перамычак першага паверха выходзяць за плоскасць сцяны. Тры верхнія паверхі скругленай часткі галоўнага фасада аб’яднаны класіцыстычнымі пілястрамі, на высокіх п’едэсталах, вольнай трактоўкі карынфскага ордэру. Фусты калюмнаў прарэзаны канелюрамі. На п’едэсталах прамавугольныя філёнгі з несапраўднымі паноплямі расліннага матыву. Стылістычна падобныя філёнгі змешчаны між вокнамі трэцяга і чацвёртага паверхаў.