Будынак

Будынак №4 быу пабудаваны у 1906 г. Як i іншыя дамы гэтага квартала ён з’яўляўся прыватнай уласнасцю. Сярод жыхароў горада ён быў вядомы як “турэцкая пякарня” (дарэчы ў горадзе была яшчэ адна такая ўстанова). Можна меркаваць, што пякарню адчынілі i на працягу доўгага часу валодалі нашчадкі турак-ваеннапалонных. 

Двухпавярховы прамавугольны ў плане будынак накрыты двухсхільным дахам. Фасады патынкаваныя. Вуглы будынка акцэнтаваны вуглавымі лапаткамі. Па перыметры праходзіць міжпаверхавая цяга. На першым паверсе галоўнага фасада прамавугольныя аконныя праёмы , часткова захаваліся абрамленні з шырокімі падаконнымі панэлямі (раней былі з нішамі). На другім паверсе вокны лучковыя з шырокімі абрамленнямі-перамычкамі ў верхняй частцы, на тарцовым і тыльным фасадах без дэкору. Франтоны на бакавых фасадах прарэзаны ў цэнтры двума аконнымі праёмамі, з заходняга боку захаваліся ў кутах люкарны. Фасады маюць сляды пераробак. Да бакавога заходняга фасада прымыкае аднапавярховы дом № 6.