Будынак

Мураваны двухпавярховы прамавугольны ў плане будынак. Пад часткай дома існуе падвал (42 кв.м). Накрыты двухсхільным дахам. Сцены нетынкаваныя, абліцаваны чырвонай цэглай. Пластыка галоўнага фасада выразная, архітэктурны дэкор выкананы ў тэхніцы цаглянай муроўкі з выкарыстаннем лякальнай цэглы.Галоўны фасад мае асіметрычную кампазіцыю. З правага краю фасада знаходзілася праезная арка (цяпер замуравана і на гэтым месцы зроблены аконны праём). Захавалася лучковая перамычка з замковым каменем. На другім паверсе над аркай былі два вузкія аконныя праёмы, дэкарыраваныя агульным прамым сандрыкам. Пазней аконныя праёмы былі перароблены ў адно акно звычайных памераў. Праезная арка і размешчаны над ёй аконны праём фланкіраваны лапаткамі, на другім паверсе лапаткі руставаныя.