Будынак

Мураваны двухпавярховы, прамавугольны ў плане,  неатынкаваны будынак з двухсхільным шыферным дахам. Галоўным з’яўляецца заходні фасад, дзе знаходзіцца ўваход у будынак. Першапачаткова на першым паверсе былі зроблены тры ўваходы. Цэнтральны ўваход з высокім прамавугольным парталам з чатырма філёнгавымі дзвярыма быў апраўлены дзвюма калонамі. Злева і справа ад галоўнага ўваходу знаходзіліся дадатковыя ўваходы з філёнгавымі дзвярыма. Гэтыя бакавыя ўваходы былі аформлены двухкалоннымі порцікамі з трохкутным франтонам. Калоны адрозніваліся ад антычных формаў спрошчаным антаблементам і масіўным пастаментам, злёгку звужаліся дагары. Будынак выкананы ў стыле эклектыкі з элементамі неамаўрытанскага стыля.