Будынак

Будынак па вуліцы Камсамольскай, 34 – былы дом, які быў пабудаваны ў пачатку ХХ ст. для здачы памяшканняў у арэнду. Аўтар праекту невядомы. Графічныя матэрыялы (планы і фасады будынка пачатку ХХ ст.) не былі знойдзены.

Мураваны аднапавярховы дом быў пабудаваны на вуліцы Адамаўскай, на тэрыторыі, якая адносілася да Слуцкага фарштата. Першапачаткова ў ХІХ ст. тут дазвалялася будаўніцтва толькі драўляных дамоў.

Дом быў размешчаны ў паўднёвай частцы квартала па перыметры забудовы.  Аднапавярховы будынак з кампактным планам сваёй тыпалогіяй і дэкорам характарызуе каменнае дойлідства г. Бабруйска ў пачатку ХХ ст. 

Галоўным з’яўляецца паўднёвы фасад будынка. Фланкіруючыя вокны (з лучковымі перамычкамі) апраўленыя складанай руставанай ліштвой, падваконнымі  цягамі і філёнгамі, акцэнтаваныя буйна руставанымі пілястрамі, вылучаныя надваконным поясам і рэльефнымі кранштэйнамі пад карнізам. Астатнія вокны – прамавугольныя з ліштвой, аб'яднанай з кранштэйнамі пад вянчаючым карнізам. Галоўны ўваход, размешчаны ў цэнтры фасада, акцэнтаваны лапаткамі з нішамі. Уваходныя дзверы маюць філянговыя палотны. Фасад завершаны простым карнізам са стужкай кранштэйнаў.