У склад комплекснай гісторыка-культурнай каштоўнасці - Будынкі былых казарм Ленкаранскага палка ўваходзяць дамы №№ 12, 14, 16 па вул. Леніна (былыя вул. Вялікая Магілёўская, Гогалеўская), якія ўяўляюць сабой суцэльную забудову. Дамы ўзведзены ў канцы ХІХ ст. як казармы для 163-га пяхотнага Ленкаранскага палка. У сувязі з тым, што будынкі размяшчаліся сярод жылых дамоў, было вырашана адыйсці ад прынцыпа тыпізацыі і надаць казармам рысы гарадской жылой забудовы. Параўнальны аналіз праектнага выгляду будынка з яго сучасным станам сведчыць, што за гады існавання значных перабудоў і пераробак не адбывалася.