Былы сядзібна-паркавы комплекс Грабніцкіх: рэшткі сядзібнага дома

У пачатку XIX ст. пабудаваны ў стылі класіцызму двухпавярховы прамавугольны будынак памерамі 18 × 36 м з чырвонай цэглы і атынкаванынымі фасадамі. Заснавальнікам сядзібы з’яўляецца Станіслаў Грабніцкі. Планіроўка сядзібнага дома была зменена ў час рэканструкцыі ў 1905-1907 гг. Паўночны бок будынка выходзіў на панскі двор, а паўднёвы быў павернуты да ракі Обаль. Парадны ўваход быў аформлены ў класічным стылі з стварэннем чатырохкалоннага порціка. Каля сярэдніх калон размяшчаліся дзве невялікія каменныя статуі львоў.