Комплекс былой сядзібы «Нізгалава»: сядзібны дом

У другой палове ХІХ стагоддзя на паўночнай ускраіне вёскі Двор-Нізгалава, у прыгожым і маляўнічым месцы была закладзена і пабудавана ў стылі позняга класіцызму звычайная шляхецкая сядзіба. Аднапавярховы будынак на высокім цокальным паверсе размешчаны ў самай высокай часцы парку. дом - прамавугольны ў плане працяглы аднапавярховы мураваны будынак пад вальмавым дахам. Галоўны фасад дома быў вылучаны неглыбокім рызалітам з руставанымі вуглавымі лапаткамі (порцік страчаны), рэгулярным рытмам прамавугольных аконных праёмаў, дэкарыраваных прафіляванымі сандрыкамі на плоскіх кранштэйнах і надаконнымі нішамі. Падмурак складаецца з цаглянай кладкі і валуноў.