Разам з будынкам ААТ "МПОВТ" стварае архітэктурны ансамбль паўночна-заходняга боку пл. Я. Коласа. Чатырохпавярховы з падвалам Г-падобны ў плане мураваны будынак. Накрыты пакатымі вальмавымі дахамі. Выцягнутыя крылы акцэнтаваны вуглавым вежападобным аб'ёмам, які падкрэслівае вось вул. В. Харужай і надае выразнасць сілуэту забудовы. Першы паверх галоўнага фасада аддзелены карнізам, трактаваны як цокаль, апрацаваны буйным рустам, члянёны прамавугольнымі аконнымі праёмамі, заглыбленымі ў нішы і падкрэсленымі карнізнымі паяскамі на дэкаратыўных кранштэйнах.