Палацава-паркавы ансамбль: дэкаратыўнае аздабленне інтэр’ера вежы і цэнтральнай залы палаца

Гомельскі палац - адзін з найбольш цікавых помнікаў сядзібнай архітэктуры конца XVIII - сярэдзіны XIX ст. на тэрыторыі Беларусі. Ён вызначаецца багаццем і пластычнасцю, гарманічным спалучэннем у экстэр'еры і інтэр’ерах розных мастацка-стылевых накірункаў ад класіцызму да эклектыкі. Інтэр’еры помніка ўяўляюць вялікую каштоўнасць. На першым паверсе палаца знаходзяцца парадныя пакоі: вестыбюль, вялікая калонная зала, былая залатая апалавая (цяпер зала ўрачыстых прыёмаў), чырвоная (малінавая) гасціная, белая зала (цяпер канцэртная зала). Цэнтральная (калонная) зала ў два паверхі ў плане ўяўляе сабой простаканечны крыж.