Парк імя Янкі Купалы
Парк імя Янкі Купалы
Змест
Звесткі аб каштоўнасці
Шыфр
713Г000152
Катэгорыя каштоўнасці
Тып каштоўнасці
Падтып каштоўнасці
Месца знаходжання
Датаванне
1949 г. - 1950 г.
Апісанне
Парк імя Я. Купалы быў закладзены ў 1949 г. на беразе р. Свіслачы як парк імя 30-годдзя БССР. На месцы парку да Вялікай Айчыннай вайны існаваў жылы квартал. Забудова квартала была пераважна драўлянай. Падчас бамбёжак жылыя дамы былі знішчаны. У 1949 г. на папялішчы быў разбіты парк, пасаджана больш за 4 тысячы дрэў, пракладзены алеі. Аўтар праекта парку архітэктар І. Рудэнка. Галоўная алея парку ішла па дыяганалі ад увахода з боку праспекта да выгіну Свіслачы. На ёй быў устаноўлены помнік лётчыку С.І. Грыцаўцу -- першаму двойчы Герою Савецкага Саюза. Тэрыторыя парку абмежавана пр. Незалежнасці, вул. Я. Купалы, р. Свіслач. Парк змешанага тыпу, у планіроўцы сумяшчаюцца рэгулярныя і пейзажныя рысы: геаметрычная сетка алей кантрасна спалучаецца з маляўнічым выгінам ракі. У кампазіцыі парку асноўную ролю адыгрывае дыяганальная алея, якая пачынаецца ад галоўнага ўвахода з пр. Незалежнасці, і на якой пастаўлены помнік Я. Купалу. Уваход фланкіраваны асвятляльнымі калонамі. У цэнтры парку парадны партэр, які выходзіць да берага Свіслачы. Ён завершаны архітэктурна аформленым спускам да вады з шырокімі лесвічнымі сходамі і масіўнымі бетоннымі шарамі. Ад галоўных алей разыходзіцца сетка свабодна пракладзеных сцежак.Мастацкую цэласнасць парку надаюць згушчаныя насаджэнні па перыметры, уздоўж алей і партэра. Асноўныя алеі на пэўных участках абсаджаны адной пародай дрэў, у асноўным ліпай драбналістай. Сярод насаджэнняў пераважаюць мясцовыя пароды: ліпа, клён вастралісты, дуб звычайны, ясень звычайны, бяроза барадаўчатая, белая акацыя, рабіна звычайная, кізільнік, снежнаягаднік і інш. Сярод экзотаў -- елка калючая, піхта сібірская, туя заходняя, конскі каштан звычайны, арэх маньчжурскі, клён блакітны, клён татарскі.
Доступ да аб'екта