Гістарычная забудова плошчы Леніна прадстаўлена жылымі дамамі другой паловы XVIIІ - пачатку ХХ стст. 

Захаваўся фрагмент такой забудовы другой паловы XVIIІ ст., які ўключае дамы № 7, 9, 11. Яны былі пабудаваны М.К. Агінскім для прыдворных рамеснікаў. Пастаўленыя адзін каля аднаго аднапавярховыя дамы арыентаваны на плошчу тарцовымі фасадамі. Гэта стварала характэрны для гарадской забудовы другой паловы XVIIІ ст. бесперапынны ланцуг аднатыпных фасадаў, як правіла, завершаных трохвугольнымі шчытамі. 

Плоскасная пабудова (дамы № 6, 8, 10, 12) спалучаецца з выгнутым у плане фрагментам (дамы № 7, 9, 11), які паўтарае крывалінейны абрыс усходняга боку плошчы.