Фрагменты сцяны XII стагоддзя знайшлі каля Сафіі ў Полацку падчас раскопак
Археалагічная экспедыцыя даследуе ўчастак каля сярэднявечнага храма, дзе раней не праводзіліся навуковыя пошукі.
Экспедыцыя Полацкага дзяржаўнага ўніверсітэта выявіла фрагменты сцяны XII стагоддзя каля Сафійскага храма падчас раскопак, паведаміў карэспандэнту Times.by старшы выкладчык кафедры гісторыі і турызму ПДУ Аляксей Коц.
Раскопкі каля храма, пабудаванага ў XI стагоддзі полацкім князем Усяславам Чарадзеем, ініцыяваныя Полацкім гісторыка-культурным музеем-запаведнікам.
Даследаванні працягваюцца ўжо два тыдні. У раскопках удзельнічаюць студэнты мясцовага ўніверсітэта. Далей працы працягнуцца з прыцягненнем валанцёраў.
“Раскопкі патрэбныя для таго, каб ацаніць стан Сафійскага сабора, таму што ў бліжэйшы час пачнуцца рамонтна-рэстаўрацыйныя работы, якія працягнуцца бліжэйшыя пяць гадоў”, – распавёў Аляксей Коц.
Паводле яго, раскопкі ідуць на ўчастку каля сярэднявечнага храма, які раней не даследаваўся. Матэрыялы археолагаў, атрыманыя ў 70-х і 80-х гадах мінулага стагоддзя, вядомыя, але яны дрэнна апрацаваны. У сувязі з гэтым музей-запаведнік і вырашыў правесці дадатковыя пошукі ля сцен Сафіі.
"Сёння мы знайшлі фрагмент сцяны XII стагоддзя. Вядома, што да самога храма, які быў пабудаваны ў сярэдзіне XI стагоддзя, былі зроблены прыбудовы пазней. Выяўлена муроўка з плінфы на вапнавым растворы з цаглянай крошкай. У бліжэйшы час мы цалкам раскрыем гэты ўчастак. Гэта рэшткі прыбудовы да першапачатковага храма - усходняй галерэі", - удакладніў кіраўнік раскопак.
Коц дадаў, што падчас работ археолагі ўжо апусціліся на глыбіню ў 1,7 м. тут зафіксаваны культурны пласт XVI–XVII стагоддзяў, калі каля сабора вялася нейкая гаспадарчая дзейнасць. Таксама падчас раскопак быў знойдзены пласт разбурэння Сафіі ў першай палове XVIII стагоддзя, сляды рамонтных работ XIX стагоддзя.
Значная колькасць знаходак пацвярджае, што гэта месца карысталася папулярнасцю ў гарадскога насельніцтва. Тут таксама былі знойдзены манеты XVII-XIX стагоддзяў, шэраг упрыгожванняў, прадметы хатняга ўжытку.
"Далейшыя працы дазволяць удакладніць архітэктурныя дэталі сабора", - падсумаваў старшы выкладчык кафедры гісторыі і турызму ПДУ.
Крыніца: t.me/timesbel, https://times.by/news/fragmenty-steny-xii-veka-nashli-vozle-sofii-v-poloczke-v-hode-raskopok
