ГРОДНА РЫХТУЕЦЦА ДА ВЯЛІКАДНЯ

ГРОДНА РЫХТУЕЦЦА ДА ВЯЛІКАДНЯ: свята-кірмаш разгорнецца на Савецкай

УЖО 28 САКАВІКА цэнтр Гродна напоўніцца атмасферай творчасці! Каля МЦ «Гродна» пройдзе рэгіянальны кірмаш «Гродзенскія традыцыі да свята Вялікадня».

Гэта будзе не проста рынак, а сапраўдны фестываль, куды з’едуцца лепшыя майстры і калектывы вобласці.

Што чакае гасцей?

Традыцыі ўжывую. На пляцоўцы «Жывыя традыцыі Гродзенскага краю» можна будзе распісваць яйкі, аздабляць вербы, ткаць ці выразаць выцінанкі.

Падарункі са смакам. Выстаўка-продаж «Завітай-купляй» прапануе ўсё неабходнае да свята - ад сувеніраў да атрыбутаў Вялікадня.

Жаночыя сакрэты. Сёлета асобная ўвага нададзена Году беларускай жанчыны. На пляцоўках «Дзявочая краса» і «Лялька ў карагодзе жыцця» навучаць павязваць хусткі і пакажуць калекцыі лялек.

Музыка і забавы. Будуць гучаць народныя песні і найгрышы. 

Дзецям - гульнёвая пляцоўка «Забаўляльны куфэрак» з тэатрамі лялек.

Кантактны заапарк.

Запрашаем сустрэць вясну разам і выбраць падарункі!