Усе жадаючыя могуць узяць удзел у традыцыйным вясновым абрадавым карагодзе “Стрылка”. Мерапрыемства пачынаецца ў 15.30 20 красавіка на плошчы каля Троіцкай царквы ў аг. Бездзеж Драгічынскага раёна Брэскай вобласці.
Ваджэнне вясновага абрадавага карагода “Стрылка” адбываецца штогод на першы дзень Вялікадня пасля вялікоднай вячэрняй службы ў царкве, якая называецца «Нешпар» (па-мясцоваму) і доўжыцца 40-60 хвілін.
Паля службы жыхары вёсак Бездзежскага сельскага савета збіраюцца для здзяйснення абраду на вясковай плошчы (па-мясцоваму – «місці») перад царквой. Бацюшка акрапляе ўсіх святой вадой. “Завадатар”, функцыю якога некалькі гадоў выконвае адзін і той жа чалавек, або самая старэйшая і паважаная жанчына (якая замужам і мае дзяцей, а таксама добра ведае, як завесці карагод) ставіць «зырнятак» (маленькіх дзетак) у выглядзе трохвугольніка. Дзеці ў сваіх групках стаяць на адным месцы, а астатнія ўдзельнікі карагода злучаюць рукі і рухаюцца па сонцу, агінаючы “зярняткі” у выглядзе падковы і выконваюць карагодную песню у спакойным, працяжным тэмпе.
Абрад захоўвае выкананне рэдкага спеву карагоднай песні “Ты лыты, лыты стрылка”.
Для ўдзелу ў абрадзе мясцовыя жыхары старанна рыхтуюцца, апранаюць традыцыйны бездзежскі строй.
Абрад перадаецца з пакалення ў пакаленне шляхам непасрэднага ўдзелу ў ім усёй вясковай супольнасці, перадаецца ў школах народнай творчасці раёна, фальклорных гуртках.
Практыка здзяйснення абраду не перапынялася з даўніх часоў. Мясцовая супольнасць лічыць дадзены абрад вялікай каштоўнасцю, вартай захавання і перадачы.
Дадзенаму элементу нематэрыяльнай культуры 22 студзеня 2014 г. на пасяджэнні Беларускай рэспубліканскай навукова-метадычнай рады па пытаннях гісторыка-культурнай спадчыны пры Міністэрстве культуры Рэспублікі Беларусь было прынята рашэнне надць статус нематэрыяльнай гісторыка-культурнай каштоўнасці Рэспублікі Беларусь.
t.me/kultinfa, https://living-heritage.by/events/2455/