Плошча ў плане мае форму блізкую да квадрата. Зберагліся будынкі калегіума езуітаў (на заходнім яе баку), дамы губернатара, магістрата, верхняй і ніжняй упраў, дом генерал-губернатара адноўлены (на паўднёвым баку), дамы каменданта і віцэ-губернатара захаваліся (на паўночным), будынак павятовага і ніжняга земскага судоў адноўлены. Будынкі двухпавярховыя, мураваныя, падобныя па планіроўцы, аб'ёмна-прасторавай кампазіцыі і дэкору. У планіроўцы і рэгулярнай забудове плошчы адлюстраваны элементы класіцызму: строгая сіметрыя размяшчэння будынкаў, вылучэнне галоўнага архітэктурнага элемента, стварэнне вялікай замкнутай прасторы.