Комплекс былой сядзібы Рэйтанаў: сядзібны дом, фрагменты парку, агароджы і бруку сядзібы, два флігелі, руіны вінакурні, дзве стайні, руіны аранжарэі, падмуркі дома ўпраўляючага, кладоўка, гумно, руіны лядоўні, капліца, агароджа капліцы, брама, стаў

Мёнтак Грушаўка з сярэдзіны XVIII ст. належаў роду Рэйтанаў. 

Да канца XIX ст. у сядзібе стаяў мураваны палац, пабудаваны ў строгіх формах архітэктуры класіцызму падчас жыцця і дзейнасці Тадэвуша Рэйтана. Відаць, менавіта ён увекавечаны на малюнку Н. Орды. 

Драўляны аднапавярховы палац быў пабудаваны Юзафам Рэйтанам у кан. ХІХ ст. У цэнтры і па баках фасада будынак вылучаны мансарднымі паверхамі, на якія вялі вінтавыя лесвіцы. Галоўны ўваход аформлены ганкам з тэрасай. Высокі падмурак палаца меў па баках мураваныя ганкі, у форме якіх можна заўважыць элементы стылю мадэрн. Інтэр'еры пакояў былі ўпрыгожаны паркетнай падлогай, кафлянымі печамі, разбёнай мэбляй. Галоўным фасадам палац арыентаваўся ў парк. У парку мелася аранжарэя . За палацам быў агарод. Непадалёк ад маёнтка Юзаф Рэйтан пабудаваў капліцу, у склепе пад якой перазахаваў рэшткі сваіх продкаў.