Беларускі элемент нематэрыяльнай культурнай спадчыны «Неглюбская тэкстыльная традыцыя Веткаўскага раёна Гомельскай вобласці» папоўніў Спіс ЮНЕСКА

Неглюбская тэкстыльная традыцыя Веткаўскага раёна Гомельскай вобласці з’яўляецца ўнікальнай з'явай беларускай народнай культуры, якая захавала архаічныя рысы і складаную сімволіку. Гэта традыцыя сфармавалася ў XVII стагоддзі і  ахоплівае стварэнне ручнікоў, прадметаў адзення і інтэр’еру з выкарыстаннем самабытных тэхнік ткацтва і вышыўкі. Асаблівую вядомасць набылі неглюбскія ручнікі, якія вылучаюцца складанай паліхромнай гамай (да 25 адценняў) і багатай арнаментальнай спадчынай, якая налічвае больш за 120 узораў, некаторыя з якіх узыходзяць да тысячагадовых традыцый. Геаметрычныя і раслінныя арнаменты («крывулі», «павукі», «яблынька» і інш.) нясуць у сабе зашыфраваныя пажаданні дабра, кахання, дабрабыту і здароўя. 

Унікальнасць тэхнікі, пры якой ткацтва вядзецца з адваротнага боку, забяспечвае непаўторнасць кожнага вырабу. Як аб’ект гісторыка-культурнай спадчыны Беларусі, традыцыя працягвае жыць дзякуючы безупыннай пераемнасці пакаленняў, што захоўваюць ўнікальныя тэхнікі і сімвалічную мову народнага мастацтва. 

Мясцовыя жыхары працягваюць выкарыстоўваць традыцыйныя тэкстыльныя вырабы ў паўсядзённым жыцці і прыкладаюць значныя намаганні дзеля распаўсюджвання практык традыцыйнага неглюбскага ткацтва, асабліва з мэтай перадачы ведаў новаму пакаленню. 

Уключэнне гэтага рамяства ў Спіс ЮНЕСКА стала вынікам сумеснай працы супольнасці неглюбскіх майстроў, экспертаў і спецылістаў па ахове нематэрыяльнай культурнай спадчыны, Нацыянальнай камісіі Рэспублікі Беларусь па справах ЮНЕСКА, Міністэрства культуры Рэспублікі Беларусь, Міністэрства замежных спраў Рэспублікі Беларусь, Пастаяннага прадстаўніцтва Беларусі пры ЮНЕСКА і Беларускага дзяржаўнага ўніверсітэта культуры і мастацтваў.

З уключэннем «Неглюбскай тэкстыльнай традыцыі» спісы нематэрыяльнай культурнай спадчыны ЮНЕСКА налічваюць сем беларускіх элементаў. 

Раней ўключаны святочны абрад «Калядныя цары» вёскі Семежава Капыльскага раёна Мінскай вобласці, 2009 г. ; «Святкаванне ў гонар іконы Маці Божай Будслаўскай (Будслаўскі фэст)», 2017 г. ; «Юраўскі карагод» у в.Пагост Жыткавічскага раёна Гомельскай вобласці, 2019 г. , Культура бортніцтва, 2020 г. ; «Саломапляценне Беларусі: мастацтва, рамяство, уменні», 2022 г. , «Выцінанка – традыцыйнае мастацтва выразання паперы ў Беларусі», 2024.