Што адбываецца з млынам і капліцай у Лошыцкім парку?

Лошыцкі парк перажывае сваю "прайм-эру": рэшткі, якія дзесяцігоддзямі стаялі, адкрытыя ўсім дажджам ды вятрам, паступова набываюць форму і змест. Першымі "здаліся" рэстаўратарам гаспадарчыя пабудовы на вуліцы Чыжэўскіх. Замест іх цяпер стыльны загс, рэстаран і новая пляцоўка для масавых мерапрыемстваў. А з нядаўніх часоў у рукі спецыялістаў трапілі атмасферныя руіны капліцы і старога млына. Вы ўсе іх дакладна бачылі, але не ўяўляеце, як гэтыя славутасці выглядаюць цяпер.

Работы па аднаўленні капліцы і млына вядуцца з пачатку верасня. Хто не паспеў сфатаграфаваць сябе і будынкі да гэтага моманту, той спазніўся — звыклы нам за дзясяткі гадоў выгляд згублены назаўжды. Абодва аб'екты цяпер - актыўныя будпляцоўкі, якія сур'ёзна змяніліся. Пачаўся працэс, як водзіцца, з узмацнення падмуркаў і сцен: пабудовы пабачылі на сваім веку нямала і пахваліцца трываласцю ўжо не могуць. З капліцай прыйшлося “пагаварыць” дадаткова: падсыпаць адхоны і сфармаваць схілы, у спрадвечным выглядзе пляцоўка была "непрыступнай".

Разам з будаўнікамі на аб'ектах працуюць і археолагі. Пакуль пра сенсацыйныя знаходкі не было заяўлена, але, можа, усё яшчэ наперадзе.

Што нас чакае пасля заканчэння работ? Цагляны чырвоны будынак млына стане трохпавярховым - да ўжо існуючага аб'ёму "прырасцяць" мансардны паверх. Пад яго ўжо на ўсю моц вяжуць арматуру. Таксама тут з'явіцца дадатковая прыбудова. Дзякуючы ўсяму гэтаму ў будучыні наведвальнікі змогуць на свае вочы ўбачыць, як працуе сапраўдны механізм млына. У цэлым жа на тэрыторыі млына з'явяцца летняе кафэ і сувенірны павільён. 

«У рэчышчы сухога ручая, выкладзенага камянямі, усталююць рэзервуар з вадой, дзе размесцяць вадзяное кола. Музейная экскурсійная зона, дэгустацыйная, абедзенная і банкетная залы, безумоўна, прыйдуцца па душы гасцям парку», — упэўненыя ў «Мінскбудзе».

Капліца XVIII стагоддзя змянілася яшчэ больш сур'ёзна. Зусім нядаўна тут быў усяго адзін фрагмент сцяны працягласцю 13 метраў. І вось — ужо «закрыты перыметр»: тысячы адзінак чырвонай цэглы прынялі патрэбную форму. Тэмпы проста неверагодныя.

Старое з новым зрошчваюць ювелірна. "Па праекце аблічча будынка будзе адноўлена ў цэгле на аснове акварэльнага пейзажу Ю.Пешкі з захаваннем ранейшых габарытаў, архітэктурных элементаў, гістарычнай формы даху з трохкутнымі франтонамі», — тлумачылі перад стартам работ будаўнікі. Капліца ў выніку ператворыцца ў выставачную залу — у ёй будуць размяшчацца розныя тэматычныя экспазіцыі. 

Работы праводзіць "Мінская спадчына", якая рэанімавала ўжо многія гарадскія аб'екты. Завяршыць "глоу-ап" гістарычных пабудоў плануюць у верасні 2027 года.

Аўтар: Аксана Красоўская. Фота: Аляксандр Ружэчка