У аграгарадку Люсіна Ганцавiцкага раёна Брэсцкай вобласцi адбылося свята фальклорнага мастацтва "З Тройцаю ў лета"

Тройца сімвалізуе прыход лета, росквіт прыроды і ўрадлівасць зямлі. У народзе кажуць: “Прыйшла Тройца – трэба ў зелень убрацца”. І сапраўды, у гэты дзень нашы продкі ўпрыгожвалі свае хаты і храмы галінамі дрэў, кветкамі, духмянымі травамі.

 Адзначыць адно з самых светлых і радасных свят беларускага народнага календара ў Люсіна прыехалі фальклорныя калектывы Ганцавіцкага і суседніх: Клецкага, Лунінецкага і Ляхавіцкага раёнаў.

Свята пачалося святочным шэсцем яго ўдзельнікаў. Пасля адбылася конкурсная праграма “Траецкая песня”, на якой калектывы прэзентавалі элементы абрадавага дзеяння, вусную народную творчасць, траецкія песні, традыцыйныя танцы і гульні, якія перадаюцца з пакалення ў пакаленне.

На працягу ўсяго святкавання працавалі пляцоўкi: “Народная кухня”, “Традыцыйныя гульнi”, выставы майстроў народных умельцаў (карункапляценне, ткацтва, вышыўка, вязанне, пляценне кошыкаў), “Этнадыскатэка” для ўсіх жадаючых. Народны майстар Рэспублiкi Беларусь Вольга Івановіч праводзіла майстар-клас па традыцыйным роспiсу.

Свята “З Тройцаю ў лета” – цудоўная магчымасць акунуцца ў атмасферу традыцый беларускага народа.
             Святлана Марцінкевіч, намеснік дырэктара ДУК “Ганцавіцкая раённая ЦКС”