Архітэктурны ансамбль вул. Кірава з вакзалам і Прывакзальнай плошчай

Архітэктурны ансамбль забудовы вул. Кірава створаны нанова пад кіраўніцтвам архітэктара В. Гусева. У праектаванні таксама прымалі ўдзел А. Данілава і В. Данілаў. Вуліца з'яўляецца важным гарадскім элементам і кампазіцыйнай воссю ў планіроўцы цэнтральнай часткі горада. Праходзіць перпендыкулярна вул. Леніна. Шырыня вуліцы 66 м, у тым ліку бульвар 24 м, дзве праезджыя часткі па 12 м і тратуары па 9 м. Цягнецца ад Прывакзальнай плошчы, дзе па цэнтральнай восі ўзведзены будынак вакзала, да Заходняй Дзвіны. Перад Кіраўскім мостам яе завяршаюць вежавыя аб'ёмы будынкаў гасцініцы "Дзвіна" і інтэрната каледжа сувязі. У забудове вул. Кірава дамінуюць 4- і 5-павярховыя жылыя дамы з памяшканнямі гандлёвага і грамадскага прызначэння на першых паверхах.Кампазіцыя вуліцы заснавана на стылявым адзінстве пластычнага вырашэння фасадаў з выкарыстаннем элементаў класічнай спадчыны. Цэласны характар забудове прыдаюць прыкладна аднолькавыя працягласць і вышыня будынкаў, падабенства гарызантальных і вертыкальных чляненняў (карнізы, цягі, пілястры і інш.) Фасадныя плоскасці ўзбагачаюць балконы, эркеры і іншыя архітэктурныя элементы.