Вуліца Першамайская – адна з магістральных вуліц горада. З’яўляецца адным з асноўных архітэктурна-планіровачных элементаў гістарычнага ядра  Кобрына. З даўніх часоў была шчыльна забудавана, на вуліцы сяліліся купцы, рамеснікі, агароднікі. Тут знаходзіліся ўчасткі, якія належалі Спаскаму манастыру, касцёлу,  яўрэйскаму кагалу. 

Гістарычная забудова вул. Першамайскай прадстаўлена ў асноўным жылымі і грамадскімі будынкамі канца ХІХ – пачатку ХХ ст. і 1920 – 1930-х гг. Гэта пераважна аднапавярховыя адной стылістыкі дамы, размешчаныя па лініі вуліцы, некаторыя мелі мансардныя паверхі. Да нашага часу на вуліцы захоўваецца маштабная малапавярховая забудова. 

У архітэктурным рашэнні фасадаў дамоў выкарыстаны характэрныя для таго перыяду аконныя і дзвярныя ліштвы, лапаткі, нішы, філёнгі, карнізы. Будынкі, што фарміруюць забудову вул. Першамайскай, захаваліся з пэўнымі стратамі гістарычнага аблічча. Галоўным чынам, жылыя дамы і грамадскія будынкі падвергліся перабудовам падчас аднаўлення пасля вайны, у 1960 – 1980-я гады, у пачатку 2000-х гадоў. Многія будынкі атрымалі цяперашні выгляд пасля рамонту ў 2009 годзе.